شلون مرزوق كون ثروته ؟

بقلم ابن الضاحية

أنا قلت بتكلم عن تجارة السلاح وعلاقتها بمرزوق الغانم، والصراحة أن الموضوع طويل ولكن بحاول أنى اختصر خوفا من الملل، إلى ما تعرفونه أن عائلة علي الغانم ماكانت غنية ولا تعرف الفلوس لها مكان ، على الغانم والد مرزوق الغانم كان عنده اخو أسمة فؤاد الغانم إلى كان من اكبر تجار السلاح يمكن بالوطن العربي

فؤاد الغانم كان تجار سلاح استثنائي ومعروف عندنا وعمل صفقات مع الحكومة الكويتية بالملايين والمليارات وطبعا لما كون هالثروة من الطبيعي أن يدخل أخوه علي الغانم بالشركات والصفقات من باب أنها شركة أسرة الغانم

علي الغانم ماكان عنده ولا شركة ولا ثروة وبالعكس كان وضعة الاقتصادي عادي جدا ولكن فؤاد الغانم من باب خلاه شريك بكل شي وهذا طبيعي وهالشي كلنا نسويه لي مافيه خير بأهله ما فيه خير بالناس وهني طلعت شركة BMW وبنفس والوقت مرزوق الغانم خلص دراسته وما ادري إذا فعلا كان يدرس بأمريكا ، ولكن خلص دراسته وصار مهندس ومن الطبيعي أن يشتغل بشركة الأسرة

وللحين أتذكر سيارة علي الغانم كانت بيجو وكان بالعربي منتف ماكو شي، المهم اشتغل مرزوق الغانم بالشركة وتمكن منها وصار بيوم وليلة الكل بالكل وحصل على ثقة عمة فؤاد وطلعت لنا شركة كوالتي نت واعيان وغيرها من الشركات الكبيرة والى صار لها سمعه بالسوق

وفي ليلة ظلمة واعتقد أنها كانت سنة 1998 لما حدث الانقلاب الكبير وهذي السنة مرزوق قدر أن يقنع أبوه على الغانم بان الوقت حان للاستيلاء على الشركات كلها دون استثناء وفعلا تم هالشي وطلع فؤاد الغانم من كل شي ومن كان أتذكر سيارات BMW مكتوب عليها على وفؤاد الغانم تحولت إلى علي الغانم فقط

أتذكر أيامها كنا مع أبوه في الديوانية وكلمناه يا علي ما يجوز انتوا أخوان والظفر ما يطلع من اللحم وفؤاد إلى سواك بعد ما كنت ماكو شي تنقلب علي أخوك وشلون رضيت ، قالنا أنا مالي شغل هذا شغل مرزوق وفعلته وتركته

وبنفي ذيج الأيام شفت مرزوق بالديوانية وكلمته عن الموضوع ورد وقالي أن عمي موديل قديم من BMW وأنا النوع الجديد وبالطبع أنت لازم تغير موديل سيارتك بين وقت ووقت

أنا صراحة استغربت من الموضوع وقلت هذولة عيال الغانم كيفهم ، وأنا أتذكر هالكلام والأحداث الجديدة قلت بنفسي إلى ما فيه خير بعمه شلون يكون فيه خير فينا ، شلون نثق بواحد خان عمه، وما صان العشرة ولا الأسرة، ولما كلمت خاله ناصر الخرافي كان ردة نفس الشي هذا حلالهم وكيفهم ، والناس ما راح تتذكر وراح تركز على اليوم التالي

أقول ما أقوله والكلام كثير ولى انشالله كلام كثير بقوله، وأنا ادري حسب ما سمعت أن مرزوق الغانم سمع بالمكان هذا ، أن يا مرزوق نصحناك ترا الدنيا دواره ويوم من الأيام راح ينقلب عليك إلى سويته مو بس بالناس والى سويته بعمك من لحمك ودمك

وتعالوا شوفوا اخو مرزوق فهد الغانم كل يوم طايح بمكاتب وكلاء الوزارات وسالوه ليش أنت كل يوم تواجدك هناك تقول موظف بالوزارة وياما عطا هدايا سيارات وغيرها من الهدايا لضمان الحصول على المناقصات والطبع بالضغط من خواله ناصر وجاسم الخرافي ويكفي مناقصات كوالتي نت لوزارة الدفاع

والله ودي أتكلم عن موضوع شركات الانترنت وليس بس عندنا ثلاث شركات بس خلوها يوم ثاني

مرزوق الغانم منو فوزك بانتخابات نادي الكويت

بقلم ابن الضاحية
وأنا قاعد بالشاليه قلت أمر الربع قاعدين بشاليه واحد من ربعنا، ويمكن نسولف بجم موضوع عن الوضع ويمكن أنا الوحيد إلى قاعد احرق بنفسي، وصلت عند الربع وبعد القهوة والشاي فتحت موضوع الرياضة ومرزوق الغانم
أنا بصراحة قلت لهم الكلام إلى بقوله لكم اليوم ، أن لازم نرجع للتاريخ ونتذكر قبل لا يدش مرزوق نادي الكويت واجتماعاتنا الأولية عشان ندعم ولدنا مرزوق بالانتخابات
يمكن الربع إلى بالديوانية تذكروا الإحداث إلى مرت على هالسالفة، لان مرزوق الغانم كنا نبيه ينزل انتخابات مجلس الأمة وكان الولد حماسي وشاطر وكلامه طيب
بس أتذكر بأول اجتماعاتنا قلنا لازم نسوي شي قبل لا نخلي مرزوق ينزل انتخابات المجلس وفكرنا بنادي الكويت على الأقل هالنادي مالنا ونعرف فيه كل شي
وقتها بصراحة فكرنا أن ندخل أي نادي بس هالشي راح يخرب على مرزوق أكثر من انه ينفعه، نبي نادي لها فيه الكثير ونعرف إلى فيه ونقدر يبرز مرزوق من خلاله ، بس المشكلة كانت في البداية محمد الصقر، والصراحة الكل كان مختلف مع محمد الصقر لا الحكومة تبيه ولا أكثر التجار يبونه ومكروه من الجميع
قلنا حق أبو مرزوق شرايك نكلم أطراف بالحكومة ومنهم إخوان احمد الفهد يساعدون مرزوق الغانم بالأصوات ومنها تفتكون من محمد الصقر وعوار الراس
المهم ما قصر أبو مرزوق اقتنع بالكلام وكلم نسيبه ناصر الخرافي وكلموا أطراف بالحكومة وأخوان احمد الفهد أن نرتب أوراقنا مع بعض وان فاز مرزوق هذا بالنهاية ولدكم
وفعلا تم هالكلام والحكومة والشيوخ التزموا بكلمتهم وأتذكر أن سجلنا ناس بعضوية النادي وبكميات كبيرة وقدرنا نقنع ناس من خلال تحرك الشيوخ وأخوان احمد الفهد أن نضمنهم صوبنا
ويوم الانتخابات أتذكر الباصات إلى كانت تدخل كيفان بس للتصويت حق مرزوق وربعة، حتى انى مرة خليت الصبي يتصل على واحد من الباصات كان ماخذ ناس من الجهراء وضيع بالدرب
إلى بقوله بالكلام هذا وهالشي قلته حق الربع بالشاليه أن إلى مكن مرزوق الغانم من نادي الكويت الشيوخ واحمد الفهد وإخوانه ونفوذنا ، طيب لما تمكن مرزوق من نادي الكويت انقلب علي الناس إلى وقفت معاه، قلنا ميخالف شاب وطموح ويبي يثبت نفسه
لكن لما عارض إخوان احمد الفهد قلنا ميخالف واتفقنا معاه بأنهم خربوا الرياضة ، بس اليوم وأنا هالكلام انقال عند مرزوق الغانم بالديوانية أن يا مرزوق ترا تعبنا يا مرزوق خلاص وخر عنهم على الأقل سنة، الناس تعبت تبي استقرار يا مرزوق
وكل ما أشوفه أقوله نفس هالكلام ، خلاص يا مرزوق وقف لو سنه لا تخجل نفسك صرح وقول للحكومة انك راح تعطيها وتعطي إخوان احمد الفهد سنة وحدة بس وان ما تم شي خل يستقيلون، يقولي أخاف أن عطيتهم مجال يتمكنون من الرياضة ويحققون الانجازات وبعدها الناس تقول إنهم الصح ومرزوق الغلط
وين الغلط بالكلام يا مرزوق ميخالف الكويت أهم منا كلنا، يقولي لا إحنا بحرب ، الحرب على منو يا مرزوق؟ الناس ضايعه وحربك حرقت الكل، يقولي لا المهم أنا متعود انى دائما اكسب المباراة
الحين يا مرزوق لما الناس والشيوخ وأخوان احمد الفهد ساعدونا وخلوك رئيس نادي الكويت على الأقل رد لهم الجميل وقولهم لكم مني سنة، بس مرزوق الله يهداه كان يتأمل أن الحكومة تخليه رئيس الاتحاد الرياضي ، ما تشوفونه استذبح على لجنة الرياضة البرلمانية ولما خذاها الكويت وعيالنا ما استفادوا شي بس سواد الويه جدام العالم وصرنا مطنزه للكل أن ما نقدر نعلب كرة مثل أول
أنا هالكلام قلته بالديوانية لان لازم نخلي مرزوق الغانم يتذكر التاريخ لان إلى ماله أصل ماله مستقبل، وجليل الأصل إلى ينسى الناس إلى وقفت معاه وساعدته ورزته جدام الناس
بس مرزوق تعود أن يفوز مثل أبوه وعمه، إلى معروف كان اكبر تاجر سلاح بالكويت ، وأكيد تعرفون شلون انقلب على عمه، إلى لو ماكان عمه موجود كنتوا ما شفتوا مرزوق يبرز أو حتى يكون له نفوذ تجاري
واحتمال أقولكم سالفة تجارة السلاح والسالفة الصجية إلي شفتها جدام عيني شلون لعب مرزوق بالحلال وطرد عمه إلى من لحمه ودمه

فشلتنا يا مرزوق الغانم

بقلم ابن الضاحية

أنا واحد من الناس عندي كلام كثير ودي أقوله ، والشباب انصحوني إني افتح مدونة وأقول إلى بخاطري
والصراحة أنا وايد منبطة جبده وكنت بالع العافية من باب إن الوضع يمكن يستصلح ويمكن مرزوق الغانم إلى كنت اعتبره أخ وولد منطقة
بس اليوم أنا مليت ولازم افضح هالولد وأقول إلى بخاطري لأني واحد من الناس تعبت وأنا أتكلم معاه على أمل إن يتعلم ويفكر
بس الأخ رافع الجام للأخر ولا يهمه شي إلى مصلحته وإحنا إلى تعبنا معاه صرنا أخر تفكيره، وأنا مو من الناس إلى عندها معاملات ولا صاحب مصلحة ولله الحمد إلي عندنا كافينا ويغطي الشمس
بس الأخ مرزوق ما يشبع ولا يهمه سمعتنا ولا حتى التعب إلى قمنا فيه عشانه ، وماني مطول عليكم يا جماعة بس أنا بقول كل كلمة بخاطري، وعاد عرفني ولا ما عرفني باختصار بالطقاق وعنده 500 مفتاح انتخابي يطق برأسهم بالطوفه
وعلى طاري 500 مفتاح ، يا جماعة سامعين بمرشح أو نائب عنده 500 مفتاح ، لو يسطرهم ولا بعض يغطون الديرة
أنا قلتله بالانتخابات الأخيرة يا مرزوق ريحتك راح تفوح بالله 500 مفتاح شنو يسكر حلوجهم ، يقولي لا تحاتي
يا مرزوق والله هذيله مصلحجيه يقولي لا تحاتي ، اكتشفت إن الأخ مرزوق ولد الغانم ولد العايلة والأصل والفصل والى كنا نوقف معاه على هالاساس شاريهم بفلوس
500 واحد عطاهم ألف دينار يعني المجموع نص مليون دينار، أنا لما اكتشفت الموضوع قلت له يبا الفلوس حمدلله موجودة وماكو قصور بس شنو الفرق بينك وبين إلى يشترون الأصوات، يقولي هذا اتفاق بيني وبين خالي جاسم الخرافي، قلت له بالله جاسم يسوي الغلط أنت تروح معاه
أتذكر انى زعلت عليه أنا والجماعة إلى بالديوانية ولا نشوفه يمرنا ويعتذر إن ملزوم يسوي هالشكل لان ما يقدر يخالف خاله ، قلت له كلنا ومازلنا مع خالك يا مرزوق بس ما يجوز هالكلام ترا عيب مو بس بحقك العيب بحقنا كلنا
الصراحة لما اعتذر افتشلنا نرده قلنا يبا هذي الانتخابات وعلى الأقل مرزوق يفوز ولا غيره من هالطياح إلى بالدائرة، وفاز مرزوق وجاسم بعد، وقلنا الأمور راح تتعدل بس اكتشفنا غير هالحجي وغير هالكلام
العادة نمر أبوه بديوانهم وهذا وضع طبيعي بس شفتوا 500 مفتاح انتخابي اغلبهم صاروا يدشون الديوانية ويختلطون معانا، ناس طياح وأشكال غريبة أول مرة ندري إن في بالكويت ناس جذي، ناس حتى لغتها غير لغتنا مصطلحات غريبة ما تدري عربي هندي عراقي شنو أصله الله يعلم
كلمته يا مرزوق شنو هالاشكال يبا هذي الضاحية مو الصلبيخات ما ادري الشعبيات ، يقولي ناخبين شنو بيدين يا سلام اطردهم ولا افتح ديوانية عندهم
الصراحة أنا ما قمت أمر الديوانية ولا الربع حتى الأهل عافوا الديوانية ولما اتصل علينا ومرنا الديوانية قلنا له الوضع وما يجوز هذي ديوانية معروفة ولها ناسها والشيوخ يمرونا والوزراء والنواب إلى منا وفينا شنو هالاشكال الله يهداك
المهم ماحب يزعلنا قام وسكر الديوانية من الفشله وكلام الناس عليه، ما تدش ديوانية ماعندهم غير ربع مرزوق الغانم، أبوه ذاك اليوم انحرج من الكلام إلى سمعه
يا مرزوق أنا واحد من الناس ما قام يهمني وراح أتكلم واتمنى انك عرفتني عشان تعرف انى حاولت معاك أكثر من مرة ، بس أنت إلى خليتنا نطلع مو طورنا
ولك مني وعد انى راح استمر بالكلام ومو أنت ولا ألف غيرك يسكتني، وباجر بسولف عن موضوع الرياضة إلى خليتنا كلنا ننحرج منك